Այսօր մեկնարկած ԱԺ նիստում «Հայ ազգային կոնգրես» խմբակցության ղեկավար Լևոն Զուրաբյանը ոչիշխանական «քառյակի» անունից դիմեց ԱԺ նախագահին՝ պահանջելով անհապաղ լսումներ հրավիրել աղետալի չափերի հասնող արատգաղթի վերաբերյալ:

–Համաձայն պաշտոնական վիճակագրության՝ երկրից 2008–2013թթ. հեռացել է 212 000 մարդ, ընդ որում՝ վերջին չորս տարիներին հեռացողների տարեկան միջինը բարձրացել է 41 000-ի մակարդակի: Հայաստանի ամբողջ պատմության մեջ սա առաջին դեպքն է, երբ խաղաղ պայմաններում բնակչությունն արտագաղթում է: Երկրի քաղաքական ուժերը պարտավոր են բաց քննարկում սկսել արտագաղթի և դրա հաղթահարման ուղղությամբ,–ասել է Լևոն Զուրաբյանը

Կոնգրեսի անունից նա վստահություն է հայտնել, որ նման իրավիճակի համար պատասխանատու է օրվա իշխանությունը՝ իր համատարած կոռուպցիայով:

–Եթե դուք խնդրի հետ կապված ասելու բան ունեք, եկեք բաց խոսակցություն սկսենք մեր ժողովրդի հետ Հայաստանը դատարկվելու վտանգից փրկելու նպատակով,-նշել է Լ. Զուրաբյանը:

ՀԱԿ խմբակցության քարտուղար Արամ Մանուկյանն էլ ավելացրել է, որ ուսումնասիրել են Հայաստանում բոլոր կառույցների տվյալները դեմոգրաֆիկ փոփոխությունների վերաբերյալ, և շատ լուրջ խոսելու բան կա այդ թեմայով։

–Անհրաժեշտ է, որ խորհրդարանը իմանա դրա մասին։ Կարող եք ձևաչափը դուք ընտրել, բայց հարցի քննարկումը թիվ մեկ մարտահրավերն է այսօր։ Մենք հարցը խորհրդարանին ներկայացնելու խնդիր ենք դնում,–ասել է Ա. Մանուկյանը։

«Ժառանգություն» խմբակցության ղեկավար Ռուբեն Հակոբյանն էլ նշել է, որ հարցն առաջարկել են խորհրդարանում բարձրացնել սահմանամերձ շրջանների բնակիչները։

–Չեմ կարծում, որ արտագաղթը պայմանավորված է Սփյուռքի գոյությամբ և Արցախի խնդրով։ Արտագաղթը հետևանք է, պատճառ չէ, իսկ եթե քննարկենք պատճառները, կտեսնենք, որ հսկա սպեկտոր է բացվում,–ավելացրել է նա։

ՀՀ ԱԺ նախագահ Գալուստ Սահակյանն էլ հակադարձել է՝ եթե դուք գնահատական եք տալիս, թե ինչի հետևանք է, էլ ի՞նչը պիտի քննարկենք։

–Իսկ ընդհանրապես, նման խնդիրները հանձնաժողովների լիազորությունն են։ Հարցը նախապատրաստե՛ք, կնայենք,–ավելացրել է Գ. Սահակյանը։

7or.am