Այսօրվա մամուլի ասուլիսին ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը ողջունել է Հունաստանի խորհրդարանի կողմից Հայոց ցեղասպանության ժխտումը քրեականացնող օրինագծի ընդունումը: Միաժամանակ, նա չբացառեց օրինագծի դեմ ԵՄ–ի կողմից որոշակի քայլերի ձեռնարկումը։

«Պետք է հետևել առաջիկա ամիսներին Եվրոպական դատարանի քայլերին, քանի որ հնարավոր է՝ Եվրոպական դատարանը այն համարի խոսքի ազատությունը կաշկանդող օրենք»,–ասել է Մանոյանը։

Ըստ բանախոսի՝ նշյալ օրինագծն ընդունվել է Հունաստանի և Թուրքիայի հարաբերությունների սերտացման համատեքստում:

«Հունաստանի գործող իշխանությունը փորձում է ադրբեջանական քաղաքականություն վարել՝ հաշվի առնելով այնտեղի ներդրումները: Այս օրենքն իրենց երկրում առկա մթնոլորտի արդյունք է, և այդ օրենքը չի վերաբերում միայն Հայոց ցեղասպանությանը»։

Հիշեցնենք, որ ըստ «Այլատյացության դեմ պայքար» անունը կրող օրինագծի լրամշակված տարբերակի՝ Հունաստանի տարածքում քրեական պատասխանատվություն է սահմանվում ոչ միայն հրեաների, այլև հայերի և Պոնտոսի հույների ցեղասպանության ժխտման համար։