Ձերդ գերազանցություն Հունաստանի Հանրապետության

Նախագահ Կարոլոս Պապուլիաս

Ձերդ գերազանցություն Հունաստանի Հանրապետության Խորհրդարանի Նախագահ Վանգելիս Մեյմարակիս

Ձերդ գերազանցություն Հունաստանի Հանրապետության

Վարչապետ Անտոնիս Սամարաս

Եվրոպայի Հայկական Միությունների Ֆորումի Նախագահության անունից ի դեմս Ձեզ, մեր երախտագիտությունն ու շնորհակալությունն ենք հայտնում Հունաստանի Ժողովրդին` Հունաստանի Հանրապետության Խորհրդարանում հայերի և պոնտոսի հույների ցեղասպանությունների ժխտումը քրեականացնող օրինագծի ընդունման առիթով, որով մեկ անգամ ևս փաստվեց և դատապարտվեց անցած դարասկզբին Թուրքիայում քրիստոնյա ժողովուրդների հանդեպ իրականացված ցեղասպանությունները:

Այդ քայլով Հունաստանը դարձավ ԵՄ երկրորդ երկիրը Սլովակիայից հետո, որն ընդունեց նմանատիպ օրենք և հույսով ենք, որ 1915-1923թթ Հայոց Ցեղասպանությունը ճանաչած եվրոմիության մնացած երկրների խորհրդարաններն ևս ոճիրի 100-ամյա տարելիցին ընդառաջ կհետևեն մարդկության դեմ գործած հանցագործության փաստի ժխտողականությունը դատապարտող օրենքների ընդունման օրինակին:

Առանձնակի հոգևոր բավարարություն է պատճառում այն հանգամանքը, երբ գործընթացի սկզբում «Այլատյացության դեմ պայքար» անունը կրող օրինագծում ձևակերպումները առավել ընդհանրական էին ներկայացված, սակայն հետագայում ցուցաբերվեց քաղաքական կամք և օրենքում հստակ նշվեց, որ խոսքը հայերի և պոնտոսի հույների ցեղասպանությունների մասին է: Վեց կետերից բաղկացած օրենքը նախատեսում է խստագույն պատիժներ` ընդհուպ բանտարկություն այն անձանց նկատմամբ, ովքեր դիտավորյալ կստորացնեն, կնվաստացնեն ու կժխտեն Հունաստանի խորհրդարանի կողմից ճանաչված ցեղասպանությունները:

Լիահույս ենք, որ հիմք ընդունելով հույն և հայ ժողովրուդների դարավոր բարեկամությունը և ճակատագրերի նմանությունը, հետագայում ևս մեր քաղաքական ղեկավարությունները միասնական կպայքարեն մարդկության դեմ գործած հանցագործությունների և արատավոր երևույթների դեմ` օրինակ ծառայելով այլ պետությունների համար:

ԵՀՄՖ Նախագահ

Դոկ. Աշոտ Գրիգորյան