Սահմանադրական փոփոխությունների գործընթացի թոհուբոհում զվարճալի երանգներ են նկատվում:

Սահմանադրությունը փոխելու անհրաժեշտությունը «հիմնավորելու» համար իշխանությունը փորձում է հանրային տարբեր խավերի ներգրավել իր վերարտադրությանը միտված նախաձեռնության մեջ:

Մարզային քչաթիվ չինովնիկների շրջանում լեկցիաներ կարդալը բավարար չէ:

Այժմ թիրախավորել են երիտասարդությանը:

Հայտարարվել է ուսանողական մրցույթ՝ «Ինչպե՞ս բարեփոխել Սահմանադրությունը» թեմայով:

Դե, այնպես, ինչպես խորհրդային շրջանում էին հայտարարվում նման մրցույթներ՝ դպրոցներում եւ բուհերում: Երբ, ասենք, հանձնարարվում էր գրել «Լենինյան ուղու», «Կոմերիտմիության հոբելյանի», ԲԱՄ-ի եւ նման թեմաներով:

Եվ համամիութենական այդ մրցույթների հաղթողներին «Արտեկ» ճամբարի ուղեգիր էին տալիս կամ՝ Մարիետա Շահինյանի վերջին «գլուխգործոց» գիրքը, իսկ առաջին տեղը գրավողներին էլ՝ Բրեժնեւի «Խոպան» «մեծակտավ ստեղծագործությունը»:

Այսօր էլ նույն ոգով ուսանողական մրցույթ են հայտարարել, որպեսզի ուսանողներն իրենց առաջարկները ներկայացնեն։

«Մրցութային առաջարկները պետք է հստակ և հիմնավոր ներկայացնեն, թե հանրային կյանքի որևէ ոլորտի վրա ինչ բացասական ազդեցություն է (են) ունենում ներկայիս Սահմանադրության առանձին դրույթ (ներ) և/կամ հասարակության համար ինչ դրական փոփոխություն կարող է ակնկալվել որևէ նոր սահմանադրաիրավական կարգավորմամբ»,- նշված է հայտարարության մեջ:

Հաղթողներին էլ խոստանում են նվիրել նորագույն համակարգչային տեխնիկա, որը կնպաստի նրանց հետագա ուսմանը: Բացի այդ, նրանք վարձատրվող եռամսյա աշխատանքային պրակտիկայի կհրավիրվեն առաջատար իրավաբանական ընկերությունում:

Իրավբանականում սովորող այդ ուսանողների գովազդային արշավն էլ երաշխավորում են:

Այս հատարարությունը Արմեն Աշոտյանը տեղադրել է իր ֆեյսբուկյան էջում՝ կից խանդավառ գրառումով. «Մինչև որոշ քաղքական ուժեր իրենց նեղ պատուհաններից և «զնդաններից» են նայելու Հայաստանի քաղաքական ապագային, այդ ապագան կկառուցեն Հայաստանի քաղաքացիները, հատկապես, երիտասարդները, ում շահը ուժեղ Հայաստանն է, ում հույսը՝ ժողովրդավար երկիրն է, ում տեսլականը՝ ազատ հայ մարդն է՝ իր երաշխավորված իրավունքներով և ազատություններով:

Ի գործ»:

Բազեների նախկին առաջնորդի պաթոսը խնդալու է, բայց դե ինչ կարող ենք անել: Սրանք, որ մինչեւ հիմա «ապահով Հայաստան» էին կառուցում, որտեղից երիտասարդությունը փախչում է, հիմա էլ պոռոտախոսում են «ուժեղ Հայաստանի» մասին:

Պարզ է, չէ՞, որ սույն մրցույթում հաղթելու են սաքուլիկների տիպի ուսանողները, որոնց «առաջարկները» գրվելու են սահմանադրական «բարեփոխումների» հանձնաժողովում: Պարզ է նաեւ, որ այդ առաջարկները համապատասխանելու են այն «տեսլականին», ինչն արդեն հայտնի է:

Շատ վառ երեւակայություն պետք է ունենալ պատկերացնելու համար, որ այս մրցույթում կարող է հաղթող ճանաչվել այն ուսանողը, որն առաջարկում է չիրականացնել սահմանադրական փոփոխություններ, քանզի դրա նպատակը բացառապես իշխանության վերարտադրումն ու ցմահ կիառավարումն է։

Աշոտյանի մրցույթում նման «էքսցեսը» բացառվում է:

Ինչեւէ, սահմանադրական շոուն շարունակվում է վասն գործող իշխանության վերարտադրության: Ինչն հաջողելու համար նույն իշխանությունը նման ծիծաղելի մրցույթներ է կազմակերպում:

Կիմա Եղիազարյան