2008 թվականից հետո Սերժ Սարգսյանը սկսեց շուրջը հավաքել «ժելեած գլուխներով», «շիկ կերպարանքով», «Քեմբրիջ ու Սորբոն ավարտած», «բաբոչկայով ու ֆրակով», «սիգար ծխող ու բարձրաշխարհիկ մաներաներով» երիտասարդների:

Սույն կոնտինգենտը ՀՀԿ առաջնորդին պետք էր՝ հանրությանը ցույց տալու, որ ՀՀԿ-ի «փտած մտածելակերպով» կուսակցական վերնախավը դարն ապրել է, եւ ինքն աստիճանաբար «բարեփոխում» է թիմը՝ այն համալրելով գերինԾիլիգենտիկներով, որոնք արեւմտյան արժեքների կրող են, եւ նրանք իրենց «կրեատիվ» մտածողությամբ ու աշխարհայացքով կնպաստեն ժամանակակից աշխարհին Հայաստանի ինտեգրմանը:

Իր այդ քայլով Սերժ Սարգսյանն առաջին հերթին ինքն իրեն էր փորձում ներկայացնել իբրեւ շատ առաջադեմ ու ժամանակակից լիդեր, ով, իբր, պատրաստ է երեւույթներն ու իրերը գնահատել մի այլ հայացքով՝ հակադրվելով մինչ օրս ամրապնդված կարծրատիպերին:

Բայց դե, երբ մարդու տեսակն իրականում այլ է, ու ինքը փորձում է դա քողարկել «փայլփլուն շրջապատով», շատ կարճ ժամանակ անց բացահայտվում է, որ մարդկային այդ տեսակն իր շուրջն է հավաքել «քյարթ» մտածողությամբ և ամբիցիաներով ջահելների՝ թեկուզ նրանք փաթեթավորված լինեն «առաջադիմության» եւ «նոր մտածողության» եվրոպական ժապավեններով:

Ակնհայտ էր, որ պսպղան այդ ֆուտլյարի մեջ կատարյալ դատարկություն էր:

Ավելի ճիշտ, այդ «շիկ» կոնտինգենտի մտածողությունն ավելին չէր, քան Լիսկայինը: «Արեւմտյան արժեհամակարգի» կրող այդ ջահելների մտածողությունն ավելին չէ, քան Գալուստինը կամ Շմայսինը, ավելին չէ, քան «փուչիկ Կարենինը» եւ ՀՀԿ խմբակցության մնացած անդամներինը: Եթե կուզեք՝ այդ ջահելներն ավելի վտանգավոր են ու կեղծավոր, քան շմայսատիպ զանգվածը, քանզի վերջիններս դերի մեջ չեն ու չեն ուզում թաքցնել իրենց ով լինելը, և չեն հավակնում ղեկավար դերակատարման, իսկ ահա «ժելեոտածները» լրիվ այլ «լադի» մեջ են։

«Պահպանողական» հանրապետականների երեսը պարզեցնելու նպատակով նրանց շարքերում երիտբարեշրջիչներին տարրալուծելը ԱԺ ՀՀԿ խմբակցության «մաշված» դեմքը փրկելու խնդիրը չի լուծում: Մինչդեռ, Սերժ Սարգսյանն այդպիսի հույսեր էր փայփայում կամ էլ հանրության երեսեին էր ուզում թոզ փչել:

Պարզվեց՝ «առաջադեմ» հայացքներ ունեցող ու «արեւմտյան արժեքներով» առաջնորդվող ՄԻԱԿ-ն ավելի «քյարթու» մտածողություն ունի, քան նույնիսկ ՀՀԿ-ական «ծերակույտը»: Եթե վերջինս չափազանց զգուշավոր է արտահայտվում Սյունիքի մարզպետի պաշտոնում Լիսկայի վերանշանակման կապակցությամբ, ապա ՀՀԿ ցուցակով պատգամավոր դարձած Լեւոն Մարտիրոսյանը «7 օր»-ին տված հարցազրույցում հայտարարում է, որ ինքը շատ դրակա՛ն է գնահատում այդ վերանշանակումը:

Հարցնում են՝ ինչո՞ւ, պատասխանում է՝ «Ըտե՛նց»:

Ինչ ասենք: Սա՛ էլ Սերժ Սարգսյանի «առաջադեմ ու արեւմտամետ» թեւի մտածողությունն է: Հար եւ նման իր մտածողությանը:

Կիմա Եղիազարյան