48ժամյա հացադուլից վերդարձած շիրակցի դաշնակցակաների կարծիքով իրենց կողմից արտգործնախարարության դիմաց կազմակերպած  հացադուլն ու նստադուլը դեռ առաջին քայլերն են՝  միտված հայ ժողովրդի անվտանգության ապահովմանը: Սակայն ՀՅԴ Շիրակի մարզային խորհրդի ներկայացուցիչ Արտակ Ավետիսյանը գտնում է, որ դեռևս պահը չի հասունացել, և հայ ժողովրդին ֆիզիկական ոչնչացման վտանգ չի սպառնում, այլապես  կդիմեն առավել ծայրահեղական քայլերի:

«Եթե ես հասկանամ, որ իմ երկրի անվտանգությունը, իմ երկրի բնակչի  ֆիզիկական գոյությունը վտանգի տակ է, ես ինքս, որպես դաշնակցական, շատ ուրիշ ծայրահեղ ձևեր եմ տեսնում:

Կարելի է պայքարի այլ միջոց ընտրել. մենք հեղափոխական կուսակցություն ենք և եթե իրոք տեսնենք այդ վտանգը, անպայման մեր ասելիքը կասենք: Դաշնակցությունն այն կուսակցությունն է, որ 120 տարիների ընթացքում կարողացել է ճիշտ ու համարժեք արձագանքել: Ինչո՞ւ մենք Թալեաթին գնդակահարեցինք 1921 թվականին, և ոչ թե 1916-ին կամ դրանից առաջ: Այսինքն, Թալեաթն իր արարքի պատասխանատվությունը, ի վերջո, ստացավ: Այս դեպքում չեմ կարծում, որ հասունացել է նման պահ:

Անիմաստ է փորձել մեզ հրահրել՝ ինչո՞ւ չեք պահանջում նախագահի հրաժարականը, գնացե՛ք, ինքնահրկիզվեք հրապարակում կամ վերցրե՛ք զենքը, մեկին գնդակահարե՛ք, սրանք ուղակի պրովոկացիաներ են։ Այս պահին չկա մեկը, որին պետք է գնդակահարել. չեմ կարծում, որ ես ինձ պետք է հրկիզեմ հրապարակում, որպեսզի հայ իրականության մեջ մի երկու ապուշ քաղաքական գործիչ, որոնք հակառակ տեսակետն ունեն, համոզվեն, որ դաշնակացությունն, իրոք, լուրջ քայլերի է գնում»,- ասում է Արտակ Ավետիսյանը:

2 օր հացադուլի միջոցով նախաստորագրված արձանագրությոններին «ո՛չ» ասած դաշնակցական Արմեն Պետրոսյանը ևս համակարծիք է, որ սա դեռևս ծայրահեղ միջոց չէ, և իրենք պահեստային բազմաթիվ ծայրահեղական պայքարի միջոցների են տիրապետում՝ ընդհուպ մինչև ինքնահրկիզում, բնականաբար, կուսակցության հրահանգի դեպքում. «Սա ծայրահեղ չէ, նորմալ միջոց է, ծայրահեղն էլ կա. ՀՅԴ-ի պատմության մեջ ծայրահեղ միջոցներ շատ են եղել: Աստված չանի, որ հասնենք այդ միջոցին, բայց մենք պատրաստ ենք: Եթե կուսակցության որոշում լինի, պատրաստ ենք թեկուզ ինքնահրկիզման»:

Դերենիկ Մալխասյան

Գյումրի