Մերժելով իշխանության կողմից քաղաքական երկխոսություն սկսելու առաջարկը՝ «եռյակն» իր այդ քայլով կարծես սառցեջրով դույլը լցրեց առաջարկի հեղինակների գլխին: Իշխանությունների ծրագրած գյալաջին չստացվեց։

ԱԺ նախագահի մոտ հրավիրված խորհրդակցությանը ներկա «եռյակի» երկու ուժերի ներկայացուցիչների դրսեւորած կեցվածքը բավական հետաքրքիր էր. «Եկել ենք ասենք, որ ձեզ հետ խոսելու բան չկա»:

Համարյա այսպիսին էր «եռյակի» ներկայացուցիչների պատասխանը իշխանությանը:

Դե, որովհետեւ հերթական գյալաջիին համաձայնելու դեպքում այդ գործընթացն իշխանություններն օգտագործելու էին իրենց չունեցած իմիջը նորոգելու և «եռյակին» հարվածելու համար՝ հանրությանը ներկայանալով իբրեւ հանդուրժող ու լայնախոհ իշխող ուժ:

Մինչդեռ, օրեր առաջ, երբ Սերժ Սարգսյանը հրահանգում էր վարչապետին վերանայել «եռյակի» 12 պահանջները եւ յուրաքանչյուր հարցի լուծման ուղղությամբ «ճանապարհային քարտեզ» մշակել, նա այնքան վստահ էր, որ «եռյակը» «խելոք-խելոք» կհամաձայնի, եւ իշխանությունների հետ կնստի բանակցային սեղանի շուրջ:

Այնինչ, «եռյակը» բանակցությունները կամ քաղաքական երկխոսությունն ուղարկեց գրողի ծոցը:

Սերժ Սարգսյանի հերթական «նախաձեռնողական» երկխոսությունից «եռյակի» որոշումն ակնհայտորեն նյարդայնացրել է իշխանություններին:

Դրա համար էլ Էդուարդ Շարմազանովն անմիջապես ոչիշխանական ուժերի մերժումը որակեց իբրեւ «մարգինալության նշան»:

Ավելին, Շարմազանովը զուգահեռ անցկացրեց Թուրքիայի եւ «եռյակի» միջեւ, որոնցից առաջինը դրսում է նախապայմաններ առաջ քաշում, իսկ երկրորդը՝ ներսում:

Սա այն դեպքում, երբ «ֆուտբոլային դիվանագիտության» մեկնարկից անմիջապես հետո ոչիշխանական ուժերն են զգուշացրել, որ թուրքական կողմը վտանգավոր նախապայմաններ է առաջ քաշում: Բայց դե, Սերժ Սարգսյանն անտեսեց այդ զգուշացումները եւ հայ-թուրքական գործընթացի վրա վատնեց ավելի քան չորս տարի՝ վնասելով մեր շահերը:

Ինչ վերաբերում է մարգինալությանը, ապա որտե՞ղ եք տեսել, որ իշխանություններն ընկնեն մարգինալ ուժերի հետեւից, եւ նրանց խնդրեն համաձայնել քաղաքական երկխոսությանը:

Իրեն հարգող եւ իրեն ուժեղ համարող ոչ մի իշխանություն մարգինալ ուժերին անգամ չի էլ նկատում, ուր մնաց, թե նրանց ինչ-որ հարցի շուրջ բանակցություններ սկսելու առաջարկ անի:

Պարզ է, որ իշխանությունները «եռյակի» առաջ քաշած նախապայմանին չէին համաձայնելու: Այսինքն, ոչ հիմա, ոչ հետագայում. երբե՛ք չեն գնա Ընտրական օրենսգիրքը բարեփոխելու քայլին այնպես, ինչպես «եռյակն» է ուզում:

100–տոկոսանոց համամասնական ընտրակարգին անցնելու ընդդիմության առաջարկը չեն ընդունելու եւ նման փոփոխություն չեն կատարելու:

Այլ հարց է, որ հիմա իշխանությունները «եռյակի» այս նախապայմանը պատճառ բերելով՝ վերջինիս փորձում են նախատել ու մեղադրել երկխոսությունը վիժեցնելու մեջ: Հայտարարելով, թե 12 կետերը պետք է հերթով իրականացնել, ու երբ կհասնի տվյալ կետը լուծելու պահը, այդ ժամանակ էլ դրան կանդրադառնան:

Եվ այդ ամենն այնքան խուճուճ են բացատրում, թե, իբր, 100–տոկոսանոց համամասնականը պետք է քննարկվի սահմանադրական փոփոխությունների փաթեթի հետ, եւ այլն: Այսինքն, «ձեռի հետ» էլ փորձում են «եռյակին» նաեւ ներքաշել սահմանադրական փոփոխությունների հայեցակարգի բովանդակային քննարկման մեջ:

Մի խոսքով, իսկական բլեֆ է 100–տոկոսանոց համասնական ընտրակարգին անդրադառնալու մասին իշխանությունների բացատրությունը:

Այնպես որ, չարժեր ներքաշվել անհեռանկար երկխոսության մեջ:

Եվ, իհարկե, «եռյակը» ճիշտ վարվեց, որ էս գլխից մերժեց իշխանությունների կողմից արված քաղաքական երկխոսության առաջարկը: Հատկապես որ «եռյակի» ռազմավարական խնդիրը իշխանափոխությունն է, ինչը նշանակում է, որ իշխանությունների նմանատիպ առաջարկներն, իրոք, գրողի ծոցն ուղարկվելու են արժանի։

Կիմա Եղիազարյան