«Մոսկվայի տանը» տեղի ունեցած «Նախաստորագրված արձանագրությունները հայ-թուրքական հարաբերությունների համատեքստում» խորագրով խորհրդաժողովի ժամանակ «Միտք» վերլուծական կենտրոնի փորձագետ Հրանտ Մելիք-Շահնազարյանն ասել է, թե հայ-թուրքական արձանագրություններում ձևակերպումները շատ երկիմաստ են և կարող են մեկնաբանվել յուրաքանչյուր կողմի շահեկան դիրքերից։

-Երկրորդ հանգամանքը, որը շատ կարևոր է, այն է, որ արձանագրությունների անգլերեն և հայերեն տեքստերի միջև կան տարբերություններ։ Այնպիսի տպավորություն է ստեղծվում, որ արտաքին գործերի նախարարությունը, թարգմանելով այս փաստթուղթը և ներկայացնելով մեր հասարակության ուշադրությանը, պարզապես փորձել է  կեղծել և խաբել  Հայաստանի բնակչությանը փաստաթղթի բուն էության հետ կապված հարցերում։

Նրա խոսքերով՝ նման դեպք նորից է եղել, երբ արտգործնախարարությունն իր բացթողումը որպես ձեռքբերում է ներկայացրել, սակայն այս անգամ ամեն ինչ այնքան ակնհայտ է, որ անհնար է սա ընդունել։

-Ելնելով այս ամենից՝ ես կոչ եմ անում այլ կազմակերպություներին, խնդրում և նունիսկ պահանջում, որ դեմ կանգնենք հարաբերությունների հաստատման նման ձևին։ Արդյոք ճի՞շտ է ներել Թուրքիայի՝ անցած դարասկզբին կատարած մեղքերը, ճի՞շտ է ներել և ոգևորել նոր  հանցագործությունների կատարմամբ,-նշել է նա։

Հրանտ Մելիք-Շահնազարյանը նաև ասել է, որ Թուրքիան և Ադրբեջանը մեկ պետություն են, պարզապես Ադրբեջանը խաղում է հասարակական ընդդիմադրի դերը, իսկ Թուրքիան քաղաքականություն է խաղում։

7or.am