«Ազգ» օրաթերթի գլխավոր խմբագիր Հակոբ Ավետիքյանն այսօր լրագրողներին ասել է, որ «The California Courier» թերթի խմբագիր Հարութ Սասունյանը Սերժ Սարգսյանի համահայկական ուղևորության ժամանակ նախագահին հարց է ուղղել, թե ի՞նչ կլինի, եթե Թուրքիան Հայաստանի հետ սահմանը բացելուց հետո այն նորից փակի։ ՀՀ նախագահն էլ պատասխանել է.

-Այո՛, երևի թե մենք պետք է ստորագրելուց մի վերապահում մտցնենք, եթե թուրքական կողմը փակի սահմանը, մենք այս արձանագրությունները չեղյալ ենք համարում։

Անդրադառնալով հայ-թուրքական արձանագրություններում վերապահում մտցնելու հնարավորությանը՝ «Մոդուս վիվենդի» կենտրոնի ղեկավար Արա Պապյանը «7օր»-ին ասել է, որ և՛ ստորագրելու պահին, և՛ խորհրդարանում վավերացնելու ժամանակ կողմերն, իրոք, կարող են վերապահումներ մտցնել փաստաթղթում։

-Բայց այստեղ ուրիշ խնդիր կա։ Այդ վերապահումը մեզ առանձնապես ոչինչ չի տալու, որովհետև 1969թ. ընդունված Վիեննայի պայմանագրերի մասին կոնվենցիայի 60-րդ հոդվածի առաջին կետով արդեն նման սկզբունք կա ամրագրած՝ եթե կողմերից մեկը խախտում է պայմանագրի կետերից մեկը, մյուսն ինքնըստինքյան ազատվում է այդ պայմանագրով նախատեսված իր պարտավորություններից։

Սակայն այստեղ էլ Ա. Պապյանը մեկ նկատառում ունի։ Նրա խոսքերով՝ եթե Հայաստանը տվյալ արձանագրությունները թեկուզ վերապահումով ստորագրի և ճանաչի Թուրքիայի սահմանները, իսկ հետո այդ արձանագրությունները չեղյալ համարվեն, միևնույն է, դրա իրավական հետևանքները կմնան, և ՀՀ-ն չի կարողանա «սահմանների ճանաչումից հետ կանգնել»։

7or.am