Ռազմավարական և ազգային հետազոտությունների հայկական կենտրոնի  տնօրեն, քաղաքագետ, վերլուծաբան Ռիչարդ Կիրակոսյանը լրագրողների հետ հանդիպման ժամանակ ներկայացրել է, թե որտեղ ենք մենք հոկտեմբերի 10-ին տեղի ունեցած արձանագրությունների ստորագրումից հետո,  ի՞նչ պատահեց Ցյուրիխում, դրանից հետո ի՞նչ արձագանքներ եղան, ո՞ւր ենք մենք գնում հիմա, և ի՞նչ է լինելու հաջորդիվ՝ ի՞նչ պետք է անենք։

-Սկսվել են քաղաքական խաղերը, և այժմ այս գործընթացը ուղղորդվել է դեպի խորհրդարան, բայց մարտահրավերները թուրքական խորհրդարանում են։ Մենք կարող ենք ակնկալել, որ Թուրքիայի խորհրդարանն այն կարող է հետաձգել մինչև մյուս տարվա սկիզբ։ Թուրքիան շատ ուրախ է, որ Հայաստանի և Սփյուռքի միջև նման մասնատումներ են տեղի ունեցել, որ բաժանումներ են տեղի ունենում ներսում, և որ սա թուլացրել է Հայաստանին,-ասել է նա։

 Ռիչարդ Կիրակոսյանի խոսքերով՝ Ցյուրիխում Հայաստանին պաշտպան են կանգնել  ԱՄՆ-ը և Շվեյցարիան, «որոնք հիասթափվել են Թուրքիայից, բայց ամենահետաքրքրականն այն է, որ ռուսներն ու ԵՄ-ն չէ, որ պաշտպանել են Հայաստանին, այլ ԱՄՆ-ը և Շվեյցարիան»։

-Ստորագրումից ընդամենը մեկ օր անց թուրքական կողմը նոր պահանջներ ներկայացրեց. վարչապետ Էրդողանն ասաց, որ մինչև Ղարաբաղի խնդիրը չլուծվի, և մինչև Հայաստանը «օկուպացված» տարածքներից չհանի զինուժը, խորհրդարանը չի վավերացնի այս արձանագրությունները։ Հաջորդ քայլն, ըստ տրամաբանության, այն է, որ չորեքշաբթի օրը Բուրսայում ֆուտբոլային խաղը տեղի ունենա։ Իմ կարծիքով ՀՀ նախագահը պետք է հստակեցնի, որ չի գնա Բուրսա, եթե Թուրքիան շարունակի խաղալ այս խաղերը,-ասել  նա։

Նրա պնդմամբ՝ ՀՀ խորհրդարանը պետք է կապի իր գործողությունները Թուրքիայի խորհրդարանի գործողությունների հետ, և եթե նրանք հետաձգեն, նույն կերպ  պետք է վարվենք և մենք։

«7օր»-ի այն հարցին, որ եթե (ինչպես սովորաբար լինում է) ՀՀ-ի կողմից, ինչպես ինքն է առաջարկում, արձագանք չլինի Թուրքիայի պահանջներին, ինչպիսի՞ն պետք է լինի ելքն այս իրադրությունից, Ռիչարդ Կիրակոսյանը պատասխանել է, որ ամենաճիշտը պաշտոնական լիդերների կողմից հայատարություն անելն է։ Իշխանափոխության հարցի վերաբերյալ էլ նա փորձեց զգույշ պատասխանել։

-Նույնիսկ հայ-թուրքական ամենալավ սցենարի դեպքում ներքաղաքական խնդիրը չի լուծվում։ Մարտի մեկի քաղաքական ճգնաժամը չի ավարտվել. չլուծված ներքին խնդիրները չեն բերում ուժեղության, որի կարիքը կա արտաքին ուժերի համար։

7or.am