Թուրքիայի ԱԳ նախարարը կարծում է, որ իրենց երկրում հայկական հարցի քննարկումների վերաբերյալ առաջընթաց է գրանցվել։ Այս մասին տեղեկացնում է «Ամերիկայի ձայնը»։

Նրա խոսքերով՝  թուրքերի կամ հայերի պատճառով չէ, որ երկու ժողովուրդների միջև խնդիրներ են առաջացել. ցեղասպանության պատճառը, ըստ նրա, Օսմանյան կայսրության փլուզման ընթացքում ազգայնական շարժումների ակտիվացումն էր:

-1915-ը խորհրդանշական տարեթիվ է հայերի համար,-ասել է նա՝ այդուհանդերձ նշելով, թե չի ցանկանում արդարացնել որևէ սխալ։- Եթե եղել են սխալներ, ապա դրանց մասին պետք է խոսել: Բայց եթե մենք անտեսում ենք մնացած 9 դարերը և կենտրոնանոմ ենք մի ժամանակի վրա, երբ քաղաքական կարգուկանոնը բացակայում էր Թուրքիայի ողջ տարածքում, ուրեմն մենք խնդիր ենք ստեղծում։

Նա նշել է, որ չի ասում, թե ոչինչ տեղի չի ունեցել. «Ոչ, ինչ-որ բան եղել է, բայց ինչ-որ բան եղել է նաև մեզ հետ, բոլորիս հետ»։

Այժմ, նրա խոսքերով, վերականգնելու ժամանակն է, քննարկելու ժամանակն է, այլապես բոլոր ազգերը կսկսեն մեղադրել միմյանց ցեղասպանության մեջ։

-Այժմ վերականգնելու ժամանակն է։ Դա է պատճառը, որ մենք ստորագրեցինք արձանագրությունները։ Այս հասկացողությամբ։ Ես ինքս եմ դրանք ստորագրել,- ասել է նա։

Հիշեցնենք, որ Ահմեդ Դավութօղլուն պաշտոնական այցով գտնվում է Վաշինգտոնում։