Պահպանողական կուսակցության նախագահ Միքայել Հայրապետյանը «7օր»-ի հետ զրույցում խոսելով մարտի 1-ի իրադարձություններից հետո առաջացած հասարակության բևեռացվածության մասին՝ ասել է, որ արտաքուստ թվում է,  թե այդ բևեռացվածությունն անցել է, բայց ներքուստ շատ ավելի վատ իրավիճակ է ստեղծվել։

-Ներքին օտարում կա սեփական երկրից, որն ավելի վտանգավոր բան է։ Մարտի 1-ի վերքը ներքին արյունահոսության է տանում, և հասարակությունն ինքն իրենից խռոված է,-ասել է նա։

Անդրադառնալով հայ-թուրքական հարաբերությունների համատեքստում ներքաղաքական իրավիճակին՝ Պահպանողական կուսակցության նախագահը նշել է, որ  հայ-թուրքական հարաբերություններն, ի խորոց սրտի, մեր հասարակությանն այնքան էլ չեն հուզում։

-Ներքաղաքական իրավիճակ Հայաստանում պարզապես գոյություն չունի։ Հայաստանում լուրջ առումով քաղաքականություն չկա, իսպառ կայացած չէ, և երբ չկա քաղաքական դաշտ, անիմաստ է խոսել ներքաղաքական իրավիճակից, լուրջ հարաբերություններից, խաղերից։ Ընդամենը կարող են լինել ինտրիգներ, հասարակական և իշխանական հարաբերություններ, որոնք, ներսից պրկված, արտաքուստ զինադադարի վիճակում են։ Հիմա կա հայ-թուրքական հարաբերություններն ու ղարաբաղյան խնդիրը լուծելու համար դրսի ուժերի կողմից իշխանության բերված մի ուժ, և մյուս կողմից կա ուժ (հասարակությունը փորձել է իր միջից սերուցք արտազատել), և այն ներկայանում է համաժողովրդական շարժման՝ ՀԱԿ-ի տեսքով, որը կարծեք թե արտաքուստ մարում է, իսկ ներքուստ ընդհակառակը՝ զսպանակի նման պրկվում,-ասել է Միքայել Հայրապետյանը։

7or.am