ԼՂՀ վարչապետ Արա Հարությունյանն ու գյուղնախարար Արմո Ծատրյանը Բերձոր քաղաքում հանդիպել են Քաշաթաղի շրջանի վարչակազմի և համայնքների ղեկավարների հետ։

«Այս տարվա ցածր բերքատվության ցուցանիշը մտահոգիչ է ոչ միայն Արցախի, այլև շատ երկրների համար»,-նշել է Արա Հարությունյանը՝ հավելելով, որ դրա պատճառը նորից հողն առանց ագրոկանոնների մշակելն է: Աշնանացանի առաջին փուլի աշխատանքներն ամենադանդաղն ընթանում են հենց Քաշաթաղում: Եթե նախորդ տարիներին շրջանում կատարվում էր մինչև 8000 հա աշնանացան, ապա առայսօր կատարվել է 878 հա հերկ:

ԼՂՀ կառավարության մամուլի ծառայության փոխանցմամբ՝ անկախ ամեն ինչից' ԼՂՀ վարչապետը հորդորել է չհուսալքվել, քանի որ պետությունն ամեն կերպ շարունակելու է աջակցել գյուղացուն և թեթևացնել նրա բեռը: Ինչ վերաբերում է ժամկետանց պարտավորություններին, ապա ԼՂՀ նախագահի հանձնարարականով կառավարությունը մոտ օրերս պատրաստելու է աշնանացանի աշխատանքները ժամանակին կատարելու մասին որոշում և որպես առաջին քայլ երեք տարով հետաձգվելու է կուտակված պարտավորությունների մարումը:

Նույն հանձնարարականով կառավարությունը հետամուտ է լինելու ժամանակին ֆինանսական միջոցներ հայթայթել ու տրամադրել սերմացուի, դիզվառելիքի համար:

Ա. Հարությունյանը համայնքի ղեկավարներին խորհուրդ է տվել փոխհատուցում ստանալու հույս չփայփայել: Ճիշտ վերարտադրություն կազմակերպելու նպատակով կառավարությունը շարունակելու է միայն տարբեր կարգի փոխառություններ տրամադրել: Վարչապետը հորդորել է նաև աշնանացանն իրականացնել հիմնականում անջրդի տարածքներում, իսկ ոռոգովի տարածքները թողնել գարնանացանի, հատկապես եգիպտացորենի և բանջարաբոստանային կուլտուրաների մշակության համար: Նա նաև հավաստիացրել է, որ շրջանը ոռոգման խնդիր չի ունենա:

7or.am