ՀՀ Ազգային ժողովում «Լեզվի մասին ՀՀ օրենքում փոփոխություններ անելու մասին» օրենքի նախագծի վերաբերյալ լսումների ժամանակ «Մենք դեմ ենք օտարալեզու դպրոցների վերաբացմանը» նախաձեռնության անդամ, արվեստագիտության դոկտոր, ԵՊՀ հայ արվեստի պատմության ՅՈՒՆԵՍԿՕ-ի ամբիոնի վարիչ Լևոն Չուգասզյանը խոսք վերցնելով նշել է, որ երբ երիտասարդը 17 տարեկանից հետո սովորում է օտար լեզուներ, նա յուրաքանչյուր օտար լեզու թարգմանում է իր մայրենի լեզվով, որը հղկվում և բյուրեղանում է:

-Մենք Ձեր երկարաշունչ և մանվածապատ ելույթները երբ լսում ենք հաճախ հեռուստատեսությամբ, այն տպավորությունը չենք ստանում, որ դուք օտար լեզուներ գիտեք, Ձեր խոսքը հստակ և տրամաբանված չէ: Բացի դրանից դուք բազմաթիվ օտարաբանություններ եք գործածում, որոնց համարժեքները կան հայերենում և դա կասկած չի թողնում, որ դուք բավականաչափ գրագետ չեք տիրապետում հայերենին: Եթե Դուք հայերենին պատշաճ մակարդակով չեք տիրապետում և օտար լեզուներ չգիտեք, ինչպես կարող եք դուք տնօրինել հայեցի կրթության հարցերը, խնդիրները, իմանալ մարտահրավերներն ու ակնկալվող վտանգները և առհասարակ, ինչպես կարող եք Դուք կրթության և գիտության հարցերով զբաղվել: Եթե երեխան լսում է հեռուստատեսությամբ Ձեր ելույթը, ուրեմն նա այն տպավորությունն է ստանում, որ կարելի է նախարար դառնալ հայերենը վատ իմանալով և ինչու պետք է այդ երեխան հայերենը լավ սովորի: Ի վերջո, ես առաջարկ եմ անում կառավարությանը Ձեզ փոխադրել այնպիսի մի աշխատանքի, որը համապատասխանում է Ձեր կարողություններին,- ասել է Լ. Չուգասզյանը:

Արձագանքելով այդ ելույթին ՀՀ ԿԳ նախարար Արմեն Աշոտյանն ասել է, որ ինքը պետք է հիշի, որ բժիշկ է եղել և Լևոն Չուգասզյանին պետք է տա իր առողջական նկարագիրը, սակայն զերծ կմնա, քանի որ ԱԺ դահլիճում նկարագրեր տալու հավակնություն չունի:

-Ի տարբերություն Ձեզ՝ ինքնագովեստով չեմ զբաղվելու և չեմ թվարկելու թե ինչ կրթական ցենզեր ունեմ և այլ ինչ կրթական ծրագրեր եմ յուրացրել: Փառք տիրոջը, գոնե հասարակական այն հատվածը կամ լրատվական, որ ինձ հետ աշխատել և շփվել է դրա մասին շատ լավ գիտի: Հարցադրում օրենքի հետ կապված Ձեր հարցադրման մեջ չտեսա, բայց կարող եմ ասել, որ գուցե վարչապետին կամ երկրի նախագահին գրեք ավելի լավ է,- ասել է Արմեն Աշոտյանը:

«7օր»-ի հարցին ի պատասխան էլ  Արմեն Աշոտյանը հավելել է.

-Ես չեմ որոշել, որ ես պետք է աշխատեմ կրթության և գիտության նախարար և ես չեմ որոշում, որ ես չպետք է աշխատեմ ԿԳ նախարար: Եթե ոմանց թվում է, որ սա ճանապարհ է, որը մեղրապատ է և աշխատանքն ընդամենը բերկրանք է, ապա խիստ սխալվում են, ինչպես շատ այլ դեպքերում:

7or.am