ԱՄՆ Կալիֆոռնիա նահանգի Սան Դիեգո համալսարանի գիտնականները մի շարք ուսումնասիրությունների ադրյունքում եկել են այն եզրակացության, որ նորածինները ժպտում են ոչ թե արձագանքելով ծնողների դեմքի արտահայտությանը, այլ պլանավորելով և ընտրելով այն պահը, երբ մայրերն ու հայրերն ի պատասխան կժպտան:

«PLоS ONE» պարբերականում հրապարակված տվյալների համաձայն` ուսումնասիրությունն անցկացվել է մինչև 4 ամսական երեխաներ ունեցող 13 մայրերի և 32 կամավորների ներգրավվածությամբ, որոնք շփվել են մանկական վարքագիծ ունեցող հատուկ ռոբոտի հետ:

Հատուկ ալգորիթմների շնորհիվ գիտնականները պարզել են, որ 13 դեպքից 11-ում երեխաների ժպիտները կանխամտածված էին: Փոքրիկները կարծես զգում էին, երբ են իրենց մայրերն ավելի հակված ժպտալու, և ժպտում էին:

«Երեխաները չէին ժպտում իրենք իրենց համար. նրանք դա դիտավորյալ էին անում, որպեսզի ստեղծեն և պահպանեն այնպիսի պայմաններ, որպեսզի իրենց մայրերը ժպտան: Ապացուցել դա շատ դժվար է, սակայն երեխաների ժպիտները պատահական չեն և հստակ նպատակ են հետապնդում», - հայտնել է ուսումնասիրության հեղինակներից մեկը`Հավիեր Մովելլանը:

7or.am