ԱԺ–ում «ՀՀ 2016թ. պետական բյուջեի մասին» օրինագծի քննարկման ժամանակ ֆինանսների նախարարի առաջին տեղակալ Պավել Սաֆարյանը հայտնել է, որ 2016թ. ՀՀ արտաքին պարտքը կհասնի 50 տոկոսի շեմին:

–Պետական պարտքը 2015թ. սպասողական ՀՆԱ-ի նկատմամբ կազմելու է 48.3 տոկոս: 2016թ. նախգծով՝ կազմելու է 49.4 տոկոս։ Պետական պարտքը 2016թ. տարեվերջին կկազմի 5 մլրդ 565 մլն դոլար,-ասել է Սաֆարյանը:

Օտարերկրյա պետություններից և միջազգային կազմակերպություններից ներդրումները կկազմեն 30.2 մլրդ դրամ պաշտոնական դրամաշնորհներ: Նպատակային օժանդակությունը դրամաշնորհային ծրագրերից կլինի 35.6 մլն ԱՄՆ դոլար։ Դրանից Եվրամիության աջակցությամբ իրականացվող դրամաշնորհային ծրագրերի շրջանակներում` 9.1 մլն ԱՄՆ դոլար, ՌԴ աջակցությամբ իրականացվող Հայկական ԱԷԿ-ի N2 էներգաբլոկի շահագործման նախագծային ժամկետի երկարացման ծրագրի շրջանակներում` 8.0 մլն ԱՄՆ դոլար, ԳԴՀ զարգացման վարկերի բանկի աջակցությամբ իրականացվող դրամաշնորհային ծրագրերի շրջանակներում` 7.4 մլն ԱՄՆ դոլար, ՀԲ աջակցությամբ իրականացվող դրամաշնորհային ծրագրերի շրջանակներում` 5.4 մլն ԱՄՆ դոլար, Եվրոպական ներդրումային բանկի աջակցությամբ իրականացվող Հյուսիս-հարավ տրանսպորտային միջանցքի ծրագրի շրջանակներում` 2.6 մլն ԱՄՆ դոլար, Դանիայի թագավորության աջակցությամբ իրականացվող գյուղական կարողությունների ստեղծում դրամաշնորհային ծրագրի շրջանակներում` 1.9 մլն ԱՄՆ դոլար և 1.2 մլն ԱՄՆ դոլար`այլ դրամաշնորհային ծրագրերի շրջանակներում:

Բյուջեի դեֆիցիտը նախատեսվում է ֆինանսավորել ներքին և արտաքին աղբյուրների զուտ մուտքերի հաշվին, համապատասխանաբար` 70.1 մլրդ դրամ և 120.6 մլրդ դրամ:

Սաֆարյանը նաև հավելել է, որ կենսաթոշակների բարձրացում չի նախատեսվում։

7or.am