ԵԱՀԿ Մինսկի խմբի ամերիկացի համանախագահ Ջեյմս Ուորլիքը «Թվիթթերի» իր միկրոբլոգում գրել է, որ համանախագահները Լեռնային Ղարաբաղի հակամարտության թեմայով ելույթ են ունեցել ԵԱՀԿ Մշտական խորհրդում:

Ավելի վաղ նա հայտնել էր, որ ԼՂ հարցը քննարկվել է Գերմանիայի ԱԳ նախարարի հետ։

Իսկ ԵԱՀԿ Մինսկի խմբի տարածած հաղորդագրությունում անդրադարձ է կատարվել Եվրոպայի խորհրդի խորհրդարանական վեհաժողովում քննարկված բանաձևի նախագծին։

«Մենք հաշվի ենք առնում ԵԽԽՎ-ի կողմից Լեռնային Ղարաբաղի հակամարտությանն ընձեռվող ուշադրությունը և կիսում ենք այդ բանաձևում ներառված մտահոգությունները՝ հայ-ադրբեջանական սահմանին և շփման գծում լարվածության աճի վերաբերյալ։ Խորապես ցավում ենք մարդկային կորուստների համար»,–ասվում է համանախագահների հայտարարությունում։

Նաև նշվում է, որ իրենք ո՛չ դատավորներ են, ո՛չ փաստաբաններ, որ որոշակի դիրքորոշման աջակցեն, միաժամանակ հավատում են, որ Մինսկի խմբի ձևաչափն ընդունելի է կողմերի համար։

«Նաև՝ լիարժեք վստահություն է վայելում ԵԱՀԿ անդամ պետությունների կողմից։ Հաշվի առնելով բանակցությունների նրբությունները՝ ձևաչափը փոխելու կամ այլ մեխանիզմներ ստեղծելու փորձերը կարող են խանգարել բանակցային գործընթացին»,–հավելել են համանախագահները։

7or.am