Բրիտանիայի կառավարությունը չի ձգտելու Ռուսաստանում անցկացվելիք ֆուտբոլի 2018թ. Աշխարհի առաջնությունը չեղյալ հայտարարելուն։ Այս մասին հայտնում է ТАСС–ը։

«Մենք չենք ձգտում սովորական քաղաքացիներին պատժելուն»,–նշել է Բրիտանիայի վարչապետի ներկայացուցիչը։

Այն, որ Լիտվինենկոյի գործի պատճառով Մեծ Բրիտանիան չի ձգտելու ԱԱ–2018–ի չեղարկմանը, հայտարարել է նաև այդ երկրի վարչապետ Դևիդ Քեմերոնը։ Թեև նա սպառնացել է, որ նոր պատժամիջոցներ կկիրառվեն Ռուսաստանի նկատմամբ։ Այս մասին հայտնում է «ren.tv»–ն։

«Sky News»–ը ևս գրում է, որ Քեմերոնը չի բացառել Լիտվինենկոյի սպանության գործի վերաբերյալ հաշվետվության հրապարակումից հետո Ռուսաստանի նկատմամբ նոր սահմանափակումների ընդունումը։

«Մենք ևս մեկ անգամ շատ ուշադիր և մանրազնին կուսումնասիրենք հաշվետվության տեքստը, սակայն դա հաստատում է բրիտանական կառավարության տեսակետը, նաև՝ լեյբորիստական նախկին կառավարության, որը ճիշտ քայլեր է ձեռնարկել այդ ուղղությամբ»,–ասել է Քեմերոնը։

ԱԱ–2018–ի հանդիպումներն ընթանալու են հունիսի 14–ից մինչև հուլիսի 15–ը 11 քաղաքի 12 մարզադաշտում։

Հիշեցնենք, որ Լոնդոնի թագավորական դատարանը ռուսական հատուկ ծառայությունների նախկին աշխատակից Ալեքսանդր Լիտվինենկոյի սպանության հնարավոր իրագործողներ է համարել Անդրեյ Լուգովոյին և Դմիտրի Կովտունին։

Դատավոր Ռոբերթ Օուենը նախօրեին հրապարակել էր իր որոշումը՝ եզրակացնելով, որ Լիտվինենկոյի սպանությունը Լոնդոնում, հավանաբար, հավանության է արժանացել ԱԴԾ նախկին ղեկավար Պատրուշևի և ՌԴ նախագահ Վլադիմիր Պուտինի կողմից։

Դատավորը բացառել էր ինքնասպանության վարկածը։

«Վստահ եմ՝ նա կանխամտածված կերպով թունավորվել է 3–րդ անձանց կողմից»,–նշել էր Օուենը՝ հավելելով, որ Լուգովոյն ու Կովտունը «Պոլոնիում-201» նյութը լոնդոնյան «Millennium» հյուրանոցում լցրել են Լիտվինենկոյի թեյի մեջ։

7or.am