Մարքսիստական կուսակցության առաջնորդ Դավիթ Հակոբյանն այսօր լրագրողների հետ հանդիպման ժամանակ խոսել է ընտրական իրավունքի անկատարության մասին, և պատասխանելով «7օր»-ի հարցին, թե իր կանխատեսմամբ ապագա խորհրդարանում ո՞ր ուժերը ներգրավված կլինեն՝ ասել է.

-Եթե մնա նույն ընտրական իրավունքը, հաջորդ պառլամենտում էլ կհայտնվեն նույն ռոժաներն ու նույն մոռդաները, և անիմաստ կլինի ճակատամարտել այսօրվա ավազակախմբերի հետ։

Դ. Հակոբյանի խոսքերով՝ Եվրոպայի կեղծ դեկլարատիվ հորդորների և իբր ճնշումների տակ մեր իշխանություններն այսօր ուզում են իբր բարեփոխումներ մտցնել ընտրական իրավունքում, բայց  «իրականության մեջ մենք տեսնում ենք կեղծ, իմիտացիոն բնույթի ձևափոխումներ»։

Բանախոսն ասել է, թե մեզ անհրաժեշտ է այնպիսի ընտրական իրավունք, որը կարող է դառնալ բնականոն ընտրությունների և գաղափարական սերնդափոխության երաշխավորը, և որը կարող է լինել հասարակության կենսաբանական ու ֆիզիկական անվտանգության երաշխավորն իշխանափոխության ընթացքում։

7or.am