Կառավարության հետ հարցուպատասխանի ժամանակ ԱԺ պատգամավոր Շիրակ Թորոսյանը դիմելով ՀՀ ԱԳ նախարար Էդվարդ Նալբանդյանին՝ ասել է.

-Դուք բազմիցս հայտարարել եք, որ հայ-վրացական հարաբերություններում չկա մի այնպիսի խնդիր, որ չլուծվի բանակցությունների միջոցով։ Վերջերս ՀՀ-ում էր գտնվում Վրաստանի արտգործնախարար Գրիգոլ Վաշաձեն։ Նախապես մամուլում հրապարակվել էր, որ ի թիվս այլ օրակարգային հարցերի՝ քննակվելու են նաև վրացահայությանը, մանսավորապես ջավախահայությանը վերբերող խնդիրներ։ Ինչպիսի՞ խնդիրներ են քննարկվել բանակցությունների ժամանակ, և ի՞նչ խնդիրներ են լուծում գտել։ Արդյոք քննարկվե՞լ են Վրաստանում Հայ Առաքելական եկեղեցու իրավական կարգավիճակի հարցը։ Արդյոք քննարկվե՞լ են հայերենը տրածաշրջանային լեզու դարձնելու հարցը։ Արդյոք քննակրվե՞լ են այս ուսումնական տարում Ջավախքի դպրոցներում հայերենի դասաժամերի կտրուկ կրճատման և նրա փոխարեն վրացերենի դասերի կտրուկ  ավելացման խնդիրը։ Ինչպե՞ս եք գնահատում Գրիգոլ Վաշաձեի այն հայտարարությունը, թե ինքը չի ճանաչում, չգիտի՝ ինչ բան է  Ջավախքը և այդպիսի անվանում քարտեզի վրա գոյություն չունի։ Կարծում եք, թե դա սազակա՞ն է դիվանագետին և արտգործնախարարին։

Հարցադրմանն ի պատասխան՝ Էդվարդ Նալբանդյանն ասել է, թե ինքը նորից կարող է կրկնել, որ վստահ է, թե հայ-վրացական հարաբերություններում չկա մի այնպիսի խնդիր, որ չլուծվի բանակցությունների միջոցով, քանի որ բանակցություններին այլընտրանք չկա։

-Մենք քննարկել ենք  այն բոլոր հարցերը, որոնք մտահոգում են վիրահայությանը, և դրա մասին ասում են ոչ միայն թերթերը, այլ հայտարարել եմ ես՝ Վաշաձեի հետ ասուլիս ժամանակ, իր ներկայությամբ։ Այդ բոլոր հարցերը, որոնք մտահոգում են, բարձրացվում են, և տեղյակ են ԳԱՆ-ում՝ քննարկվել և շարունակում են քննարկվել մեր վրացի գործընկերների հետ, և որոշ հարցերին էլ լուծումներ են տրվել։ Քննարկվել են և՛ եկեղեցուն, և՛ դպրոցներին վերաբերող հարցեր։ Ինչ վերաբերում է այն տարբեր անվանումներին, որ տրվեցին Ջավախքին հայ լրագրողի և արտգոծնախարարի կողմից, ես այն կարծիքին չեմ, որ ՀՀ արտգործնախարարը պետք է խառնվեր այդ հարցուպատասխանին։ Անգամ հորդորներ կային, թե պետք է հայտարարվեր, որ ինչ-որ մեկը անգրագետ է, և այսպիսի ինչ-որ ռազբորկաներ անեի մամլո ասուլիսի ժամանակ։ Չեմ կարծում, որ դա արտգործնախարարին հարիր ոճ է։ Բանակցությունների ժամանակ Վրաստանի արտգործնախարարը խոսք տվեց, որ ժամերի ընթացքում կլուծվի, օրինակի համար, Լարսի անցակետի բացման հարցը, և դա արվեց։ Կարծում եմ՝ սրա նման լուծումներ են պետք,-հայտարարել է նա։

Շիրակ Թորոսյանն էլ ի պատասխան  հարցրել է, թե ՀՀ արտգործնախարարը չի՞ կարծում արդյոք, որ Հայաստանը պետք է Վրաստանի հետ հարաբերություններում իր քաղաքական կուսը փոխի՝ ելնելով այն հանգամանքից, որ ամեն անգամ վրացի պաշտոնյաների այցից առաջ արհեստական խնդիրներ են ստեղծվում, ինչպիսին Լարսի խնդիրն էր, որը վաղուց էր լուծված, և հետո էլ այցի ժամանակ հաշված ժամերի ընթացքում լուծում այն։

-Եվ ևս մի հարց։ Թող անձնական չընկալվի, իմ՝ հայրենի Ջավախք գնալու հարցը քննարկվել է, թե՞ չէ,-հավելել  է նա։

Ի պատասխան՝ ՀՀ արտգործնախարարը հայտարարել է, թե Լարսի խնդիրը բավական լուրջ էր, որը լուծում է գտել։

-Էմոցիոնոլ որոշումներով կամ գնահատական տալով՝ այս թե այն հարցը չես լուծի։ Պետք է պրագմատիկ և հանգիստ բանկցություններ վարել և տեսնել, թե ինչպես են հարցերը ուծվում,-ասել է նա։

Ի դեպ՝ ԱԺ պատգամավոր Շիրակ Թորոսյանի Վրաստան մուտք գործելու արգելման խնդրի քննարկմանն առնչվող հարցին այդպես էլ Էդվարդ Նալբանդյանը չանդրադարձավ։

7or.am